Psa 23 | MNA | STEP | Mboe ki Dabit Yooba, ni mboroŋan tio ŋonoono. Tana nio ko aŋbot ŋoobo pa koroŋ sa som.

aUn 48:15; Yo 10:11; Pil 4:19; Ibr 13:20; 1Pe 2:25

bMbo 36:8; Tur 7:17

cMbo 27:4+, 65:4; Yo 14:3; Tur 3:12

Psalms 23

Mboe 23

Merere ni mboroŋan tio ŋonoono

Mboe ki Dabit

1 Yooba, ni mboroŋan tio ŋonoono.
Tana nio ko aŋbot ŋoobo pa koroŋ sa som. ^a
2 Pa ni itunu ko iyaaru yo ma aŋla lele ta ambaiŋana kat be keteŋ su mi aŋbotmbot pa.
Lele tina na, ka kiniŋana ma yokŋana, mi narenren ambaiŋana. ^b
3 Ni ipombolmbol yo ma mburoŋ imilmiili.
Mi izzo yo pa zaala kini ndabokŋana.
Pa ina, mbulu kini ta kembena.

4 Yooba, sombe pataŋana sananŋana ikam yo mabe aŋmeete, som zugut biibi izukkaala yo,
nako irao aŋmoto na som.
Pa nu mbotmbot raama yo.
Mi nu ko poroukaala yo mi pazal yo.
Tana aŋmoto kosa sa som, mi leleŋ ambai men.

5 Nu pomoozo yo kat.
Pa ŋgun mbalia, mi kam koŋ kini biibi ila koŋ koi bizin matan.
Mi nu kam yo ma aŋwe leembe ku, mi liŋ ŋgere isala uteŋ, mi kam koŋ yok ambaiŋana be aŋwin.
Tabe kam ma leleŋ ambai kat.
6 Ŋonoono kat, Yooba, nu toto sua ku mbukŋana mi urur lelem pio.
Kampeŋana mi muŋaiŋana ku ko imarmar pio ma irao aŋzem toono ti.
Mi nio ko aŋbotmbot raamu lela itum murim,
mi iseeŋge iseeŋge ma ila. ^c